نقلت لكم هالقصيده المأثره من كتاب. احاول فيها اقول لكم شي.
اقروها وتعرفونه. قصيدة ابو لعياله .الله يستر علينا ويعافينا.
قال الذي يقرا بليّا مكاتيب
ياللي تقرون العمى من عناكم
ياعيالي اللي تشرفون المراقيب
تريضوا لي واقصروا من خطاكم
خذوا كلام الصدق ما به تكاذيب
مثل السند مضموم للي وراكم
ياعيال لا صرتوا ضيوف ومعازيب
ترى الكلام الزين ملحة قراكم
وترا السبابه من كبار العذاريب
وهرج البلايس ما يطول لحاكم
المذهب الطيب فهو مذهب الطيب
والمذهب الخايب يبور نساكم
ياعيال ما سرحتكم باللواهيب
ياعيال ما عمر المعزب ولاكم
ياما توليت القبايل تقل ذيب
من خوف لا ينقص عليكم عشاكم
وياما شريت السمن من عرض ماجيب
يفز قلبي يوم يبكي حداكم
ياما قطعت من الفيافي العباعيب
ندور من صيد البراري غذاكم
ياعيال دوكم لحيتي كلها شيب
هذا زمان قعودنا في ذراكم
قمت أتوكا فوق عوج المصاليب
قصرت خطانا يوم طالت خطاكم
عطوني القرضه عليكم مطاليب
عطوني القرضه جزى من جزاكم
لابد يومن عاوين دوني الذيب
بالقبر ما افرق بين طيبكم من رداكم
ماني بفاضحكم وسط الأجانيب
بأعمالكم يدرون كل أقرباكم
لو كان تدرون الردى والمعاييب
صرتوا مع المخلوق مثل خوياكم
خوالكم بالطيب تروي المغاليب
ولو تتبعون الجد محدن شناكم
وش علمكم ياتاركين المواجيب
حسبي عليكم هالردى وين جاكم
يالله عسى اعماركم شمسها تغيب
يعتم قمركم ثم تظلم سماكم
ياعلّكم في حاميات اللواهيب
ياللي على الوالد خبيث لغاكم
شفت الجفا والحيف والغلب والريب
بضلوعكم لا بيّض الله قراكم
اطلب عسى نساكم ما تحمل ولا تجيب
ولا احدن من الوغدان يمشي وراكم
اخسوا خسيتوا ياكبار اللغابيب
اهبوا هبيتوا يقطع الله نماكم
كان سبب القصيده هو طاعة عياله لحريمهم. طردوا ابوهم ودعا عليهم في القصيده.
استجاب الله له. ما حمل احد من حريمهم. وماتوا ضمى في القيض. وهذي نهاية العقوق.
